Über mich

I heisse Aleksander Milosz Zielinski u schaffe als Energieheiler. Das isch ei Art wieni versuche de Planet zu nem schönere Ort für üs aui z mache u Seelene uf ihrem Weg zrügg zu Gott z unterstütze.

I bi vor 10 Jahr initiiert worde i die Reiki-Tradition u ha syther viu Heilig dörfe erfahre u erlebe sowohl bi mir, wie bi Mönsche u Tier wo mir nöch stöh bis hin zu Mönsche u Tier woni no nie troffe ha (Fern-Reiki). Da ig e sehr schamanistischi Perspektive uf d Welt ha u für mi d Dynamik vo aktiv-passiv innere duale Welt e sehr wichtigi Rolle spielt, nenni mini Form vo Reiki Shamanic Tantric Reiki. Im Moment absolvieri o e Usbildig als diplomierte Tantra-Masseur.

Shamanic bedütet für mi dass i jede Mönsch i erschter Linie uf dr seelisch Ebeni wahrnimme. I bi überzügt dass Heilig uf dere Ebeni muess erfolge we sie sou wirksam sy. Idem i d seel (via ds Höchere Selbscht) frage was ds Problem isch, chumi viu schneller zur Ursach vom Problem u cha ar betroffene Person dr Weg zur Heilig erlychtere. Heile cha sich aber nume jeder selber idem er ufhört die Sache z mache wo ihn krank mache.

Tantric bedütet für mi dass i ar Dynamik vo aktiv-passiv / männlich-wyblich e grossi Rolle bimesse. Uf dr kollektive ebeni hei mir nach mindeschtens 5700 Jahr Patriarchat aka Babylon es grosses Unglychgwicht dass es nun uszglyche gilt. Als Männer stöh mir karmisch inere Art kollektivi Schuld de Froue gegenüber. Weg dem isch es extrem wichtig nyd nume jedes Nei z respektiere sondern o am Wybliche dr ruum z lah wos brucht zum sich frei entfalte u authentisch usdrücke. Nume so chöi mir das Karma nach und nach uflöse u e Welt kreiere i dem sich alli mit Respekti u Liebi begegne.

Für mi persönlich bedütet ds Tanrische erschtens dass i i mir selber probiere e Balance zwüsche mim wybliche, empfangende, intuitive Teil und em männliche, gebende, logische Teil herzstelle. Zwöitens hani keni Berührigsängscht um als Heiler mit der sexuelle Kundalini Energie z schaffe um Heilig im Gegenüber z ermögliche. I finde solang der Heiler sehr höchi ethischi Standards het u bestimmti Grenzene NIE überschrytet isch das oft dr effektivscht Weg um Heilig z ermögliche.

Reiki steht für mi für die universelli üs umgebendi Energie, o Qi oder Prana gnennt. Als Reiki-Meister schaffi bewusst mit dere höchschwingende lichtvolle Energie u probiere möglichscht viu drvo dür mi Körper lah z flüsse, um so o d Frequenz vom Kollektiv z erhöhe.